睇完大師兄寫果篇帶bb睇風水樓嘅文章，今日我都寫下類似既野。今次既內容，都係
從白鶴鳴老師嗰處得黎。好耐之前，老師帶我去看一間屋嘅風水，間屋有一隻狗，而雖然隻狗好好動，但都好純。後來坐低，個客人同老師講:
「我隻狗瞓邊最好？」
老師點左個位比佢隻狗瞓，佢再問︰「呢間屋風水好唔好？」老師答︰「幾好，丁位同財位都好。」佢聽到就再講︰「我以前揀樓既時候，次次都帶呢隻狗去，而間間屋都住得唔錯，所以我覺得隻狗對風水好有感覺。後黎，我有好朋友揀樓時，我都會幫佢地手揀樓，想幫佢地揀到層住落財運又好，人又平安嘅風水樓。通常在睇樓前，事先問過如果係無人居住嘅屋，我就會『靜靜雞』帶埋隻狗去，睇下隻狗有乜野反應。隻狗大吠就梗係走人，隻狗四圍行，好似鍾意間屋嘅話，我就叫朋友可以考慮。依家果幾個朋友都話住得唔錯。你睇下我隻狗似唔似有第六感，能夠感覺到間屋風水好唔好？」
客人講完，我就聽到老師答佢︰「有d動物會有第六感，對間屋嘅感應會特別強。有啲bb、老人家、甚至一些成人，第六感都會好強，佢地揀樓大致上會感應到風水好唔好。不過，真正想知道風水好唔好､有甚麼方面好，例如屋企人聰明､旺財抑或旺桃花，咁就真係要精通風水嘅人，先真正知道間屋風水點樣！」
呢次聽完老師同客人傾偈，我先知道原來可以帶「bb、老人家、狗」去幫手睇樓。
編輯部小師弟──山中七日
本文刊載日期
2015年6月27日